អ៊ុយក្រែន អះអាងពីការដណ្តើមបានមកវិញបន្ថែមទៀត នូវទឹកដីភាគខាងកើត និងភាគខាងត្បូង

 

(កៀវ)៖ នៅថ្ងៃចន្ទនេះ អ៊ុយក្រែនអះអាងថាដណ្តើមបានទឹកដីបន្ថែមទៀតមកវិញ នៅសមរភូមិជួរមុខភាគខាងកើត និងភាគខាងត្បូង ក្នុងប្រតិបត្តិការវាយបកប្រឆាំងកងកម្លាំងរុស្ស៉ី។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី១១ ខែកញ្ញា ឆ្នាំ២០២៣។

អនុរដ្ឋមន្រ្តីការពារជាតិអ៊ុយក្រែន លោកស្រី ហាន់ណា ម៉ាលីអារ (Hanna Maliar) បានឲ្យដឹងថា កាលពីសប្តាហ៍មុន កងកម្លាំងទីក្រុងកៀវដណ្តើមបានមកវិញនូវផ្ទៃដីជិត ២គីឡូម៉ែត្រក្រឡាដែលនៅជុំវិញទីក្រុងបាកមូត ភាគខាងកើត ដោយចាប់យកបានភូមិមួយក្នុងទីក្រុងអៅឌីវកា (Avdiivka) និងភូមិមួយទៀតក្នុងតំបន់ដូណេត (Donetsk)។ នៅឯភាគខាងត្បូងវិញ អ៊ុយក្រែនដណ្តើមបាននូវផ្ទៃដី ១.៥គីឡូម៉ែត្រក្រឡា ជាកន្លែងដែលកងកម្លាំងកំពុងព្យាយាមឆ្ពោះទៅកាន់សមុទ្រអាហ្សូវ (Azov) ដោយការវាយបំបែកខ្សែការពាររបស់រុស្ស៉ី។

គួរបញ្ជាក់ថា បើតាមអនុរដ្ឋមន្រ្តីការពារជាតិរូបនេះ ក្នុងប្រតិបត្តិការវាយបករយៈពេល ៣ខែមកនេះ កងកម្លាំងអ៊ុយក្រែនរំដោះផ្ទៃដីបាន ៤៩គីឡូម៉ែត្រក្រឡានៅជិតទីក្រុងបាកមូត ប៉ុន្តែទីវាលពោរពេញដោយមីន និងលេណដ្ឋានដ៏ធំរបស់រុស្ស៉ី នៅតែជាឧបសគ្គធំសម្រាប់អ៊ុយក្រែន៕